Matvælastofnun bendir dýraeigendum sérstaklega á að þegar varað er við háum gildum brennisteinsdíoxíðs (SO2) í lofti þurfi einnig að hafa í huga að mengunin hefur sambærileg áhrif á dýr og menn.
Segir frá þessu á heimasíðu stofnunarinnar.
„Áhrifin eru meiri því lengur sem dýrin eru útsett fyrir menguninni. Dýraeigendur þurfa að draga sem mest úr álagi á dýrin þegar magn brennisteinsdíoxíðs í andrúmslofti er hátt, s.s. hlaup, erfiða vinnu og streituvaldandi aðstæður.“
Brýnir Matvælastofnun því fyrir fólki að fylgjast vel með dýrum sem eru á útigangi og hýsa þau ef vart verður við einkenni á borð við roða í augum, hósta, öndunarerfiðleika eða hegðun sem bendir til að dýrin finni fyrir óþægindum.