Mannanafnanefnd hefur hafnað beiðni um Huxland sem eiginnafn karlmanns. Í úrskurði nefndarinnar segir að nafnið líti út eins og millinafn eða ættarnafn auk þess sem land sé hvorugkynsorð og brjóti það í bága við íslenskt málkerfi að hvorugkynsnafnorð sé notað sem eiginnafn. Einnig segir í úrskurðinum að engin dæmi séu um það á mannanafnaskrá að -land sé notað sem síðari liður eiginnafns.

Hins vegar samþykkti mannanafnanefnd Þyril sem eiginnafn karlmanns enda taki það íslenskri beygingu í eignarfalli, Þyrils, og teljist að öðru leyti uppfylla ákvæði 5. gr. laga nr. 45/1996 um mannanöfn. Var það því fært á mannanafnaskrá.

Það sama á við um Bergsveinu og Símonu sem eiginnöfn kvenmanna. Bæði taka þau íslenskri beygingu í eignarfalli, Bergsveinu og Símonu, og teljast þau að öðru leyti uppfylla ákvæði 5. gr. laga nr. 45/1996 um mannanöfn. Voru því nöfnin Bergsveina og Símona færð á mannanafnaskrá.

Tengdar fréttir

Mannanafnalög

Nú má heita Strympa og Doddi

• Dylan, Óríon, Lucy og Telekía fá grænt ljós
• Mannanafnalög ógni hugsanlega málkerfinu
• Fyrstu kynhlutlausu nöfnin samþykkt
• Ekki einhugur um mannanafnafrumvarp innan VG

» Fleiri tengdar fréttir

• Blogga um frétt