Krapastíflan í Jökulsá á Fjöllum teygir sig 2,5 kílómetra niður fyrir Grímstaða brú og 3 kílómetra upp fyrir hana samkvæmt upplýsingum frá Veðurstofu Íslands. Krapastíflan er sú stærsta síðan í desember 2010.
Bera fór á ístruflunum á þessum stað um miðjan desember 2014 en skömmu fyrir árslok dró mjög úr þeim. Krapastíflan hóf hinsvegar að byggjast up þann 11. janúar og virðist lítið lát á. Samkvæmt frétt á vefsvæði Veðurstofu Íslands eru krapastíflur frekar algengar á þessum stað en þær myndast þegar kalt er í veðri og skafrenningur. Getur þykkt stíflunnar náð svipaðri hæð og brúargólf Grímsstaðabrúar og rennur þá vatn yfir þjóðveginn.
Ef rennsli eykst hinsvegar skyndilega vegna snarprar hlýnunar í veðri og hláku eða vegna jarðhitavirkni þá er töluverð hætta á ferðum. Áin getur þá rutt sig í þrepahlaupi með miklum látum.
Vonast er til þess að áin finni sér farveg og bræði af sér stífluna jafnt og þétt.
Hægt er að sjá fleiri ljósmyndir af krapastíflunni á vef Veðurstofunnar.
Tengdar fréttir:
Stærsta krapastífla síðan í desember 2010