Ákveðið hefur verið að byggja nýtt 250 kúa fjós í Flatey á Mýrum. Byrjað er á byggingu haugtanks fyrir nýja fjósið. Langafurðahæsta kýr landsins, Laufa 1089, er í Flatey.
„Það er allt gott við hana, hún er geðgóð og hraust og dugleg að láta mjólka sig,“ segir Kristín Egilsdóttir, fjósameistari í Flatey, um Laufu. Mjaltaþjónar eru í fjósinu og fer Laufa oft undir þá.
Kýrin skilaði rúmlega 13 þúsund kílóum í mjólkurtankinn í Flatey á síðasta ári. Þegar Laufa kom í Flatey 2008 hafði hún lokið tveimur mjaltaskeiðum en síðan hefur hún skilað 61.327 kg mjólkur, að því er fram kemur í umfjöllun um nýja fjósið í Morgunblaðinu í dag.