Íslandsbanki spáir því að útflutningstekjur ferðaþjónustunnar verði 342 milljarðar króna í ár, eða ríflega milljón krónur á hvern Íslending.
Greinin hefur vaxið mun hraðar en hagkerfið og með sama áframhaldi verða tekjurnar farnar að nálgast útgjöld ríkisins innan nokkurra ára, en þau eru áætluð um 640 milljarðar í ár, að því er fram kemur í fréttaskýringu um þetta efni í Morgunblaðinu í dag.
Samtök ferðaþjónustunnar spá 15% fjölgun ferðamanna í ár, borið saman við 20% fjölgun á síðustu árum. Ingólfur Bender, forstöðumaður Greiningar Íslandsbanka, segir ferðaþjónustuna orðna „langumfangsmestu atvinnugrein þjóðarinnar á mælikvarða gjaldeyrisöflunar“.