Herjólfur til Landeyjahafnar í dag

„Skeytið sem allir hafa beðið eftir. Herjólfur siglir til Landeyjahafnar í dag 1. maí kl 17:00. Segjum það aftur Herjólfur siglir til Landeyjahafnar í dag.“

Á þessum orðum hófst tilkynning sem birtist á Facebook-síðu Herjólfs fyrr í dag en Herjólfur siglir í fyrsta skipti á þessu ári til Landeyjahafnar. Skipið sigldi síðast þangað hinn 30. nóvember á síðasta ári.

Tvö dæluskip Björgunar ehf. hafa unnið að dýpkun Landeyjahafnar upp á síðkastið en fyrst um sinn voru dæluskipin þrjú. Gunnlaugur Kristjánsson, forstjóri Björgunar, sagði í samtali við Morgunblaðið í dag að dýpkun hafnarinnar gengi vel. Búið sé að fjarlægja um 100 þúsund rúmmetra af sandi, þar af um 40 þúsund af rifinu sem er komið í fulla dýpt.

Gunnlaugur Grettisson, rekstrarstjóri Herjólfs, var að vonum hæstánægður þegar mbl.is náði tali af honum í dag. Hann segir að áætlun Herjólfs næstu daga taki mið af sjávarstöðu líkt og hefur verið gert undanfarin ár. „Væntingar standa til þess að við getum farið að sigla á áætlun til Landeyjahafnar á næstu dögum,“ sagði hann en Herjólfur siglir inn í Landeyjahöfn á flóði í dag.

Áfram verður unnið að dýpkun hafnarinnar að sögn Gunnlaugs en veðurskilyrði eru mjög góð þessa stundina og útlit er fyrir að svo verði áfram næstu daga.

• Blogga um frétt