Á morgun lýkur hringferð Karls Friðrikssonar og Grétars Gústavssonar á traktorum. Með ferðalaginu hafa þeir safnað pening til styrktar Vináttu – forvarnarverkefni Barnaheilla gegn einelti. „Núna erum við staddir á Hvolsvelli og skröltum í bæinn á morgun um þrjú,“ segir Karl í samtali við mbl.is.
„Í dag ætlum við að fara á Selfoss og stoppa hjá umboðsaðila Massey Ferguson. Vegalengdirnar eru stuttar núna, miðað við það sem við höfum farið.“ Lengsta dagleið félaganna var frá Akureyri til Egilsstaða. „Eftir það erum við öllu vanir.“
Karl og Grétar fengu skemmtilega fylgd undir Eyjafjöllum í gær. „Bændur komu á móti okkur á dráttarvélum og gömlum bílum sem tengdust meðal annars safninu á Skógum og keyrðu með okkur dágóðan tíma undir Eyjafjöllum. Eftir það fórum við í heimsókn til eins bónda á Áshólsskála og drukkum þar kaffi og með því og spjölluðum við bændur. Gaman þegar fólk tekur þetta upp á sig að mæta okkur á þennan hátt.“
Karl neitar því ekki að hann sé frekar „hristur“ eftir ferðlagið. „Við erum með smá ryðu, það er erfitt að neita því. Þetta er eins og að vera á sjó; þú venst sjónum en færð smá ryðu þegar þú kemur í land.“
Þeir hafa ekki enn orðið varir við fólk sem er pirrað á traktorunum en þeir hljóta hins vegar mikla athygli. „Stundum keyra bílar framhjá okkur og koma aftur og taka þá myndir.“
Ferðinni lýkur formlega í Olís í Norðlingaholti um klukkan þrjú á morgun. „Spennufallið kemur annað kvöld!“
Hægt er að leggja söfnuninni lið með því að hringja í 904-1900. Hvert símtal kostar 500 krónur, eða senda sms í sama númer sem kostar einnig 500 krónur.
Einnig má leggja inn á bankareikning Barnaheilla 0334-26-4521, kt. 521089-1059.