Sigrún Þuríður Geirsdóttir varð í kvöld fyrsta íslenska konan til að synda ein yfir Ermarsund. Sundið tók 23 klukkustundir og 30 mínútur, að því er kemur fram á Facebook-síðu Sigrúnar.
Sigrún lagði af stað frá Dover á suðurströnd Englands um miðnættið í gær að íslenskum tíma og kom að landi á Gris Nez-höfða í Frakklandi á tólfta tímanum í kvöld.
Þetta er ekki í fyrsta sinn sem Sigrún tekst á við Ermarsundið. Þannig synti hún á síðasta ári boðsund yfir sundið ásamt Helgu Sigurðardóttur, Corinna Hoffmann, Hörpu Hrund Berndsen og Sædísi Rán Sveinsdóttur og árið 2013 með Sækúnum.