„Það sem byrjaði sem mánaðarlangt verkefni varð fljótlega að þremur mánuðum.“ Svona hefst bloggfærsla sem Júlíanna Ósk Hafberg, fatahönnunarnemi, birti í dag en þar segir hún frá reynslu sinni af því að ganga í sömu fötunum í þrjá mánuði.
Mbl.is ræddi við Júlíönnu í maí sl. en þá ætlaði hún sér að gera tilraun til að ganga í sömu fötunum í mánuð. Þegar mánuðurinn var liðinn langaði henni þó að halda áfram, og skyndilega voru mánuðirnir orðnir þrír.
„Og þessum 12 vikum lauk fyrir þremur vikum síðan. Ekki því mig langaði til þess, heldur því ég neyddist til þess,“ skrifar Júlíanna.
Hugmyndin kviknaði hjá Júlíönnu eftir að hún fór að fylgjast með fólki sem lifir svokölluðum ómenguðum lífstíl (e. zero waste lifestyle). Fólk sem lifir eftir því hendir engu og kaupir ekkert í umbúðum. Er það yfirleitt ekki með rusl á heimilinu, og reynir þannig að sporna gegn ruslmengun í heiminum. Í því samhengi bætir hún á þá staðreynd að jarðarbúar séu búnir með auðlindir jarðarinnar í ár.
Eftir að hafa lesið grein um konu í Bandaríkjunum sem klæddist alltaf sömu fötunum í vinnunni, vegna pressu um faglegan klæðaburð á vinnustað, ákvað Júlíanna að fara sína eigin leið. „Hugsunin er sú að kaupa minna og nota það meira, því það er virkilega orðið of mikið af öllu í heiminum,“ sagði Júlíanna í viðtalinu.
Fatnaðurinn samanstóð af buxum, skyrtu, peysu, jakka og skóm - og átti Júlíanna tvö sett af buxum og peysum til skiptanna. Fötin þvoði hún í höndunum þess á milli, en var alltaf í sömu flíkunum.
Júlíanna gekk í sömu fötunum daginn út og inn í 12 vikur samfleytt, eða 84 daga. Á þeim tíma segist hún hafa þurft að gera smávægilegar breytingar, til að mynda þegar hún var í Berlín og hitinn fór yfir 30 gráður og þegar hún var á Íslandi og hiti fór niður í 5 gráður. Í Berlín gekk hún í stuttbuxum sem hún hafði búið til úr gömlum gallabuxum og á Íslandi bætti hún á sig útifötum. Fyrir utan það var hún í nákvæmlega sömu flíkunum alla daga. Hún bætti ekki við skartgripum, naglalakki eða háum hælum, heldur gekk aðeins í sömu sex flíkunum.
Fyrir þremur vikum ákvað hún þó að hætta þar sem buxurnar voru orðnar rifnar í klofinu vegna núnings. Hún segist þó ekki hafa getað hugsað sér að byrja að ganga í venjulegum fötum aftur.
Júlíanna gekk nákvæmlega jafn mikið í báðum buxunum sem hún átti til skiptanna, sem eru því sex vikur fyrir hvort par. Á aðeins 42 dögum voru báðar buxurnar rifnar, þrátt fyrir að hún hafi þvegið þær í höndunum. „Þetta eru gæðin sem við fáum úr ódýrum fötum,“ skrifar hún, en segir skyrturnar þó hafa komið heilar út úr tilrauninni, sem og skórnir, jakkinn og peysan.
Þrátt fyrir að hafa lokið tilrauninni fyrir þremur vikum síðan hefur Júlíanna enn ekki byrjað að ganga í sínum hversdagslegu fötum. „Ég er búin að vera á Spáni og í Noregi með fjölskyldu minni og hef bara gengið í skyrtunni og stuttbuxunum þegar ég er ekki í bikiníi, æfingarfötum eða náttfötum,“ skrifar hún.
Þá segist hún nú vera að ákveða hvernig hún ætli sér halda áfram með verkefnið þegar hún kemur til Íslands í haust, en hún sé ákveðin í því að lifa eftir þessum lífsstíl alla daga. Hún segir það þó erfiðara en hún hélt að ákveða í hverju hún ætli að ganga og hvernig, þar sem föt sem endist geti verið erfitt að finna.
<br/><br/>Júlíanna er enn á því að verkefnið hafi breytt hugsanahætti hennar til frambúðar. „Maður er svo mikið að hafa áhyggjur af þessu þegar maður er að fara eitthvert en þetta er bara að angra mann sjálfan og hefur ekki áhrif á neinn annan. Maður er bara sjálfur að gera sér þetta og það eru allir með sömu hugsanir um sjálfa sig,“ sagði hún.
<span>„Maður þarf ekki að eiga allt. Maður þarf ekki að eiga þrjátíu varaliti, fimmtán naglalökk og fimmtíu hálsmen. Ég sé það svo mikið núna hvað það er fráleitt. </span>Þetta er svo ótrúlega frelsandi og ég hef verið algjörlega frelsuð frá þessari hugsun og þarf ekki að pæla í þessu.“
Þá segist Júlíanna viss um að allir hefðu gott af því að prófa þetta. „Maður gerir sér svo mikið grein fyrir því hvað maður þarf og þarf ekki. Það er offramleiðsla því fólk er endalaust að kaupa og það hefur vond áhrif á jörðina og okkur þó við kjósum að hugsa ekki um það.
<span>Þetta mun hafa mikil áhrif á það hvernig ég hugsa framvegis.</span>“
<a href="http://jhafberg.blogspot.dk/" target="_blank">Hér</a> má fylgjast með tilraun Júlíönnu á bloggsíðu hennar og <a href="https://instagram.com/julohaf/" target="_blank">hér</a> má fylgjast með henni á Instagram.
<strong><a href="/frettir/innlent/2015/05/14/i_somu_fotunum_i_manud_2/" target="_blank">Frétt mbl.is: Í sömu fötunum í mánuð</a></strong>