„Þú labbar inn í ristilinn og getur heilsað eðlilegri slímhúð, svo rekstu á sepa og heilsar honum. Næst kemur: varúð – þetta þarf að fjarlægja, ásamt því að þú sérð bólgna slímhúð. Svo heilsarðu líka á endanum krabbameininu.“
Þetta segir Sunna Guðlaugsdóttir, meltingarlæknir, í Morgunblaðinu í dag um risavaxið líkan af raunverulegum ristli sem finna má fyrir framan verslun Debenhams í verslunarmiðstöðinni Smáralind.
Er þetta hluti af árveknisátakinu Bleika slaufan, sem ýtt var úr vör í byrjun októbermánaðar. Fólk getur gengið inn í ristilinn og séð það sem læknarnir sjá þegar verið er að skima eftir krabbameini í ristli.