Farið verður fram á gæsluvarðhald yfir mönnunum tveimur sem handteknir voru í gær í tengslum við rán í Gullsmiðjunni í Hafnarfirði fyrir rúmri viku. Gangi það eftir munu þrír sæta gæsluvarðhaldi vegna málsins.
Aðspurður segist Margeir Sveinsson, aðstoðaryfirlögregluþjónn hjá lögreglunni á höfuðborgarsvæðinu, ekki geta gefið upplýsingar um hvort búið sé að finna þýfið. Rannsókn málsins er í fullum gangi.
Hefur lögregla farið í húsleit á nokkrum stöðum undanfarna daga, þar á meðal eina í gær þar sem tvímenningarnir voru handteknir.