Lögreglan á Suðurnesjum fékk tvo símtöl í morgun frá farþegum sem voru á leið til Norðurlandanna en þar sem þeir voru með framlengd vegabréf komust þeir ekki leiðar sinnar.
Lögregla gat ekkert gert fyrir farþegana heldur urðu þeir að leita á skrifstofu sýslumanns. Frá og með 24. nóvember sl. eru framlengd vegabréf ekki gild ferðaskírteini. Samkvæmt reglum Alþjóða flugmálastofnunarinnar (ICAO) er gerð sú krafa að vegabréf þurfi að vera véllesanlegt til að teljast gilt ferðaskilríki. Ef vegabréf hefur verið framlengt telst það ekki lengur véllesanlegt vegabréf og því ekki gilt sem ferðaskilríki.
Samkvæmt upplýsingum frá lögreglu hafa breytingarnar þó almennt gengið vel og virðast upplýsingar um þær hafa skilað sér nokkuð vel. Flugfélögin hafi einnig lagt sitt af mörkum við að kynna breytingarnar.
Lögreglan á Suðurnesjum framlengdi áður sjö til tíu vegabréf á degi hverjum og var tekin upp sú regla, eftir að breytingarnar lágu fyrir, að afhenda þeim sem fengu framlengingu upplýsingar um þær.
Þeir sem hafa nú undir höndum framlengd vegabréf og þurfa á flýtiútgáfu nýs vegabréfs að halda munu greiða fyrir slíka útgáfu sama gjald og um venjulega útgáfu væri að ræða til næstu áramóta gegn framvísun framlengds vegabréfs.
Umsókn um vegabréf tekur að jafnaði 9 virka daga, þar er meðtalinn sendingartími á umsóknarstað eða til umsækjanda (innanlands). Athugið að ekki er hægt að sækja vegabréf í afgreiðslu Þjóðskrár Íslands nema þegar um hraðafgreiðslu er að ræða.
Frétt mbl.is: Gætu þurft neyðarvegabréf