Íslensk kona á fertugsaldri, sem var dæmd í fimm ára skilorðsbundið fangelsi fyrir alvarlega líkamsárás í Ungverjalandi, hefur þegar áfrýjað dómnum. Þetta staðfestir Ingibjörg Ólöf Vilhjálmsdóttir, lögfræðingur konunnar, í samtali við mbl.is.
Konan, sem var við læknisnám í borginni Debrecen, var sökuð um að hafa byrlað vinkonu sinni svefnlyf og barið hana í höfuðið með hamri. Lögfræðingur konunnar hefur sagt að málsmeðferðin hafi öll verið hin undarlegasta.
Atvikið átti sér stað sumarið 2012. Samkvæmt ákærunni, sem lýst er í ungverskum miðlum, voru hin ákærða og fórnarlambið góðar vinkonur. Kvöld eitt hafi hin ákærða boðið vinkonu sinni, sem er frá Nígeríu, í mat. Þá hafi hún verið búin að setja svefnlyf í mat vinkonunnar.
Að sögn Ingibjargar var dómurinn kveðinn upp á miðvikudaginn en skjólstæðingur hennar var ekki viðstödd dómsuppkvaðninguna.