Björgunarsveitir hafa verið að störfum á Vestfjörðum í kvöld vegna óveðursins sem gengur nú yfir landið. Bátur losnaði við höfnina og eru björgunarmenn að störfum við að festa bátinn.
Þá fauk þak af fjárhúsi í Bolungarvík en fjárhúsið var fullt af sauðfé þegar það gerðist. Að auki hefur björgunarsveitin þurft að aðstoða við ýmis smáverkefni, til dæmis fjúkandi skjólvegg.
Að sögn Halldórs Óla Hjálmarssonar í svæðisstjórn Landsbjargar voru björgunarsveitarmenn búnir að setja sig í gírinn fyrir óveðrið og hafa störfin gengið vel hingað til.
Um tugi beiðna um aðstoð hafa borist björgunarsveitum á höfuðborgarsvæðinu. Alls hafa um 100 björgunarmenn tekið þátt í aðgerðum í dag samkvæmt upplýsingum frá Landsbjörg.