Forseti Alþingis bað þingmenn að gæta orða sinna eftir að Guðmundur Steingrímsson, þingmaður Bjartrar framtíðar, kallaði Sigmund Davíð Gunnlaugsson, forsætisráðherra, þekktasta fjárglæframann heimsbyggðarinnar í umræðum á Alþingi í dag.

Stjórnarandstæðingar hafa krafist afsagnar forsætisráðherra á þingfundi sem hófst kl. 15 vegna uppljóstrana um að hann hafi átt hlut í aflandsfélaginu Wintris Inc. á Tortóla í félagi við eiginkonu sína og ekki greint frá því. Mál hans hefur vakið heimsathygli eftir að skjölum frá lögmannsstofu í Panama var lekið til fjölmiðla og birt í gær.

Guðmundur var einn fjölmargra stjórnarandstæðinga sem kvaddi sér hljóðs undir liðnum fundarstjórn forseta. Sagði hann að frægt skilti úr búsáhaldabyltingunni sem á var letrað „Helvítis, fokking fokk“ lýsti því hvernig honum liði. Mál forsætisráðherra hefði sett heiðarlegt starf fjölmargra við að byggja upp traust og tiltrú í samfélaginu í „klessu“.

„Við erum með frægasta fjárglæframann heimsbyggðarinnar á forsíðum allra blaða þessa dagana og hann situr hér, hæstvirtur forsætisráðherra. Þekktastur fyrir það að vera með pening sinn í skattaskjólum,“ sagði Guðmundur.

Sló Einar Kr. Guðfinsson, forseti Alþingis, þá ákveðið í bjöllu sína og hvatti þingmenn til að gæta orða sinna.

Spurði Guðmundur þá þeirrar spurningar hvort að við myndum vilja að allir Íslendingar geymdu peningana sína á Tortóla.

„Af hverju ekki? Af hverju er það svona slæmt? Af hverju má hæstvirtur forsætisráðherra það augljóslega ekki?“ spurði þingmaðurinn.

Tengdar fréttir

Panamaskjölin

Fyrrverandi forsetar Panama ákærðir

• Sýkna yfir Sjólaskipssystrum stendur
• Mál Sjó­la­skipa­systkina send aftur í hérað
• Alþjóðleg handtökuskipun gefin út
• Öllum málum Sjólaskipasystkina vísað frá

» Fleiri tengdar fréttir

• 1 blogg um fréttina

Bloggað um fréttina

• Heimir Lárusson Fjeldsted: Stóru orðin