Báturinn Embla sem er nýjasta smíði skipasmíðastöðvarinnar Rafnar ehf. lagði af stað áleiðis til Færeyja frá Höfn í Hornafirði núna í morgun, en stefnt er að því að setja nýtt hraðamet yfir Atlantshafið með siglingu til Gautaborgar með viðkomu í Færeyjum, Hjaltlandseyjum og Noregi.
Báturinn fór frá Reykjavík í gær áleiðis til Vestmannaeyja og var svo á Höfn í nótt. Báturinn er 11 metra langur strandgæslubátur af tegundinni Leifur 1100 RIB. Er þetta í fyrsta sinn sem opnum báti sem þessum er siglt jafn langa vegalengd á jafn skömmum tíma.
Samkvæmt Landhelgisgæslunni lagði Embla af stað fyrr í morgun og er á rúmlega 30 hnúta hraða. Miðað við það má gera ráð fyrir að báturinn komi til Færeyja kringum hálf tvö í dag gangi allt að óskum.
Áhöfn Emblu á þessari siglingu skipa Sigurður Ásgrímsson frá Landhelgisgæslunni, sem er skipstjóri, Þorsteinn Bragi Jónínuson, Gunnar Sigurðsson, Björn Jónsson og Gunnar Víkingur, skipasmiður í Ástralíu.
Frétt mbl.is: Embla stefnir á hraðamet á Atlantshafi