Báturinn Embla er kominn til hafnar í Færeyjum eftir liðlega níu klukkustunda siglingu frá Höfn í Hornafirði. Meðalhraði ferðarinnar var 26 hnútar og er talið að með því hafi verið slegið nýtt hraðamet á þessari siglingarleið.
Embla er nýjasta smíði skipasmíðastöðvarinnar Rafnar ehf. Stefnt er að því að setja nýtt hraðamet yfir Atlantshafið með siglingu til Gautaborgar með viðkomu í Færeyjum, Hjaltlandseyjum og Noregi.
Að sögn Ragnars Þorgeirssonar, starfsmanns Rafnar, gekk ferðin mjög vel. Farið var að hvessa undir lokin en annars var veðrið gott. Vel var tekið á móti áhöfninni í Þórshöfn í Færeyjum. Á morgun verður haldinn kynningarfundur um bátinn en þar verða meðal annars fulltrúar frá strandgæslunni, útgerðum, björgunarsveitum og lögreglu.
Báturinn fór frá Reykjavík í gær áleiðis til Vestmannaeyja og var svo á Höfn í nótt. Báturinn er 11 metra langur strandgæslubátur af tegundinni Leifur 1100 RIB. Er þetta í fyrsta sinn sem opnum báti sem þessum er siglt jafn langa vegalengd á jafn skömmum tíma.
Áhöfn Emblu á þessari siglingu skipa Sigurður Ásgrímsson frá Landhelgisgæslunni, sem er skipstjóri, Þorsteinn Bragi Jónínuson, Gunnar Sigurðsson, Björn Jónsson og Gunnar Víkingur, skipasmiður í Ástralíu.
Frétt mbl.is: Aðlagan að hraðametinu hafin