Þorsteinn Sæmundsson, þingmaður Framsóknarflokksins, hefur óskað formlega eftir því að formaður efnahags- og viðskiptanefndar Alþingis boði fulltrúa Fjármálaeftirlitsins á fund nefndarinnar. Hann krefst meðal annars skýringa á því af hverju eftirlitið hafi ekki brugðist við fregnum af ítrekuðum samkeppnisbrotum Valitors sem voru framin í forstjóratíð Höskuldar H. Ólafssonar, núverandi bankastjóra Arion banka.
Í umræðum á Alþingi í dag talaði Þorsteinn um tregðu Fjármálaeftirlitsins til þess að taka á tveimur málum sem hann telur undir það heyra. Annars vegar sölu Landsbankans á hlut í Borgun og hins vegar samkeppnisbrotum Valitors.
Þorsteinn sagði á þingi í gær að fram kæmi í 2. mgr. 52. gr. laga um fjármálafyrirtæki að stjórnarmenn eða framkvæmdastjórar mættu ekki í tengslum við atvinnurekstur hafa hlotið dóm á síðustu tíu árum fyrir refsiverðan verknað samkvæmt til að mynda almennum hegningarlögum og samkeppnislögum.
„En svo vill einmitt til að í einum viðskiptabanka þjóðarinnar situr framkvæmdastjóri en á hans tíma í öðru starfi 2008, 2013 og 2014 var lögð á það fyrirtæki stjórnvaldssekt fyrir að brjóta samkeppnislög ítrekað. Stjórnvaldssektirnar nema á annan milljarð króna,“ sagði Þorsteinn.
„Nú hlýtur maður að spyrja, vegna þess að viðskiptabankinn sem um ræðir ku vera í söluferli, hvort söluverð bankans gæti hugsanlega orðið fyrir tjóni af þessari staðreynd og hvort Fjármálaeftirlitið ætli virkilega ekki að láta í sér heyra,“ bætti hann við.
Hann sagðist á þingi í dag ekki hafa fengið nein sérstök viðbrögð frá eftirlitinu. Þess vegna hefði hann óskað eftir því við formann efnahags- og viðskiptanefndar Alþingis að boða fulltrúa FME á fund nefndarinnar til þess að þeim gefist kostur á að útskýra hvers vegna eftirlitið hafi ekki tekið afstöðu í þessum málum.
Frétt mbl.is: FME láti í sér heyra