Framkvæmdir standa nú yfir í Sóltúni í Reykjavík við nýjar öryggis- og þjónustuíbúðir fyrir eldri borgara. Fyrirhugað er að byggja upp alhliða þjónustu fyrir eldri borgara á svæðinu sem ber heitið Sóltúnsþorpið. Íbúðirnar verða afhentar vorið 2017 og er sala á þeim hafin.
Þetta kemur fram í fréttatilkynningu.
Þar segir að verið sé að koma til móts við aukna spurn á fasteignamarkaði eftir þjónustuíbúðum fyrir eldri borgara. Sóltún öryggis- og þjónustuíbúðir henti vel fyrir þá sem kjósa að búa á eigin heimili en þurfa margvíslega þjónustu. Stefnt er að því að bjóða upp á heimahjúkrun og heimaþjónustu fyrir þá sem þess þurfa.
Fyrsta skrefið í uppbyggingu Sóltúnsþorpsins var hjúkrunarheimilið Sóltún. Nú standa til boða 44 öryggis- og þjónustuíbúðir að Sóltúni 1–3 og síðar er stefnt á að bæta við fjórðu hæðinni við hjúkrunarheimilið Sóltún og opna nýtt hjúkrunarheimili við Sóltún 4.
Á milli beggja hjúkrunarheimilanna er fyrirhugað að reisa tengibyggingu sem verður þjónustumiðstöð fyrir eldri borgara sem búa í íbúðunum og hverfinu. Í þjónustumiðstöðinni verður veitingastaður, líkams- og hugarrækt, iðjuþjálfun, sjúkraþjálfun, miðstöð heilbrigðisþjónustu og heimahjúkrunar og aðstaða fyrir hvers kyns félagsstarf.
„Þjóðin er að eldast og það er að fjölga í elsta hópnum, nú þegar er mikil eftirspurn eftir þjónustuíbúðum fyrir eldri borgara. Með uppbyggingu á Sóltúnsþorpinu er verið að bjóða upp á nýjan valkost sem býður upp á fjölbreytileika og aukna þjónustu við þá einstaklinga sem kjósa að búa á eigin heimili lengur,“ segir Halla Thoroddsen, framkvæmdastjóri Sóltúns öryggis- og þjónustuíbúða.