Alls hafa átján starfsmenn Heilbrigðisstofnunar Suðurlands misst störf sín en þeir voru í 13,1 stöðugildi hjá stofnuninni. Þetta staðfestir Cecilie B. H. Björgvinsdóttir, mannauðsstjóri HSU, í samtali við mbl.is.
Fyrst var greint frá málinu á Eyjar.net í morgun.
„Þetta er búið að vera að eiga sér stað síðan í apríl. Við höfum verið í endurskipulagningu og niðurlagningu á störfum til þess að halda starfseminni innan ramma fjárlaga,“ segir Cecilie en bætir við að ekki sé aðeins um að ræða beinar uppsagnir. „Eitthvað af þessu eru tímabundnar ráðningar sem hafa verið látnar renna sitt skeið.“
Cecilie segir að flestar uppsagnir hafi verið á Heilbrigðisstofnuninni á Selfossi, en þær hafi þó snert fjölmargar einingar stofnunarinnar. Hún fullyrðir þó að uppsagnirnar muni ekki hafa áhrif á klíníska starfsemi HSU, þar sem um sé að ræða niðurskurð á skrifstofustörfum og stjórnendastörfum en ekki störfum sem snúa beint að sjúklingum.
„Það sem við höfum staðið frammi fyrir er að verkefnin hafa vaxið og sérstaklega í bráðaþjónustu og utanspítalaþjónustu, eða sjúkraflutningum. Við höfum lagt metnað okkar í að standa vörð um heilbrigðisþjónustuna, semsagt klínísku þjónustuna. Þetta hafa því meira verið störf sem varða aðra hluta starfseminnar eins og störf á skrifstofu framkvæmdastjórnar. Svo höfum við verið að sameina einingar í eina einingu og setja yfir þær einn stjórnanda svo þetta hafa fyrst og fremst verið stjórnendur og starfsmenn í öðrum störfum en snúa beint að sjúklingum,“ segir hún.
Frá sameiningu heilbrigðisstofnana á Suðurlandi á árinu 2014 hefur átt sér stað veruleg fjölgun verkefna hjá stofnuninni og hefur álag aukist á öllum sviðum þjónustunnar, einkum þó bráða- og utanspítalaþjónustu. Fjárhagsleg staða stofnunar er hins vegar erfið og vantar nokkuð upp á að jafnvægi verði náð í rekstri auk þess sem stofnunin glímir við eldri skuldavanda fyrrverandi heilbrigðisstofnana á Suðurlandi.
Að því er fram kemur í skriflegu svari frá Herdísi Gunnarsdóttur, forstjóra HSU, var ljóst að það stefndi í vanda í rekstri eftir fyrsta ársfjórðungsuppgjör HSU nú á árinu. Þá hafi verið mikill þrýstingur á kostnaði við rekstur sjúkrasviðs.
„Eitt af markmiðum framkvæmdastjórnar HSU var að á þessu ári skyldi endurskoða skipulag þjónustu og mönnun með því að tryggja sem besta og öruggasta þjónustu fyrir það fjármagn sem stofnunin fær úthlutað. Þetta er viðvarandi verkefni heilbrigðisstofnanna og skylda okkar að nýta sem best það fjármagn sem við fáum til þjónustunnar. Forstjóri hafði því frumkvæði af því eftir umtalsverða vinnu framkvæmdastjórnar í aprílmánuði að skila til ráðherra tillögum að endurskipulagi og hagræðingaraðgerðum. Þær tillögur voru sendar til Velferðarráðuneytisins í lok apríl.“
Í framhaldi af því og góðu samráði við ráðuneytið hafi verið ákveðið af hálfu HSU að grípa til viðamikilla aðgerða við endurskipulagningu og hagræðingu í starfsemi stofnunarinnar. Þingmönnum voru kynntar þessar fyrirætlanir og haldinn upplýsingafundur með sveitastjórnum á Suðurlandi 31. maí s.l. þar sem málefni er varða tiltekt í rekstri og skipulagsbreytingar innan HSU voru kynntar.
Endurskipulag átti sér stað á mönnun hjúkrunardeilda á Selfossi þar sem tvær 20 rúma deildir voru sameinaðar í eina hjúkrunardeild sem skapar aukið svigrúm til samvinnu. Engin breyting verður gerð á sjúkrahúsþjónustu hjá HSU en þó sé dregið aðeins úr rúmafjölda yfir sumarið. Fjögur sjúkrarúm eru lokuð á Selfossi í sumar og fjögur sjúkrarúm í Vestmannaeyjum.„Það er eitthvað sem hefur aðallega með afleysingar að gera, þar sem það hefur ekki verið auðvelt að fá afleysingar inn í heilbrigðiskerfið. Þær lokanir eru aðeins frá júní fram í ágúst.“
Cecilie segir málið hafa verið unnið í samstarfi við heilbrigðisráðuneytið, og reynt hafi verið að milda niðurskurðinn af fremsta megni. „Við höfum fengið skilning á okkar málum hjá ráðuneytinu, sem hefur unnið mjög vel með okkur,“ segir hún.
Af þeim 18 starfsmönnum sem misstu vinnu sína má telja að 5 einstaklingar hafi misst starf hjá HSU en 2 af þeim fimm áttu rétt til árs biðlauna. Aðrir starfmenn sem aðgerðirnar snertu fengu ekki endurnýjun samninga eða voru boðin laus störf innan stofnunarinnar.
Stjórnendur stofnunarinnar hafi þó látið staðar numið núna, og í framhaldinu verði skoðað hvernig breytingarnar sem hafa verið gerðar muni hafa áhrif á heildarstarfsemina. „Þess ber líka að geta að á stofnuninni starfa 430 starfsmenn svo þetta er ekki stór hluti starfsmanna þó þetta sé vissulega erfitt fyrir þá sem verða fyrir því, og alltaf sársaukafull aðgerð“ segir Cecilie og bætir við að árangur þessara aðgerða verði endurskoðaður síðsumars og í kjölfarið verði lagðar fram tillögur um framhaldið.