Hjólagarparnir í Hjólakrafti sóttu Bessastaði heim í dag þar sem nýr forseti lýðveldisins, Guðni Th. Jóhannesson, tók höfðinglega á móti þeim. Boðið er ein fyrsta opinbera móttakan í embættistíð Guðna sem forseti Íslands.
Samtökin Hjólakraftur voru stofnuð af Þorvaldi Daníelssyni til að hjálpa börnum og unglingum sem höfðu á einn eða annan hátt orðið undir í baráttunni við lífsstílssjúkdóma og ekki fundið sig í hópíþróttum.
Þorvaldur segir í samtali við mbl.is að Guðni hafi tekið höfðinglega á móti hópnum sem taldi um 30 manns. Voru gestunum boðnar veitingar á Bessastöðum og tók forsetinn stuttan hjólatúr með hópnum.