Þórdís Lóa Þórhallsdóttir, formaður Félags kvenna í atvinnulífinu (FKA) opnaði málþing félagsins sem var haldið í morgun. „Ég er ánægð með að við séum að þróast í rétta átt. Ef tölurnar breytast um 3% á ári áfram er það tilhneiging sem er afar gleðileg,“ segir Þórdís Lóa.
Frétt mbl.is: Konur viðmælendur í 33% tilfella
Málþingið var hluti af sérstöku verkefni FKA sem stendur yfir frá 2013 til 2017 sem kallar á aukna ásýnd kvenna í fjölmiðlum.
„Hins vegar fannst mér mjög áhugavert að sjá að þetta er gríðarlega mikil ákvörðun um að gera þetta. Miklu meiri ákvörðun en maður hefði kannski hugsað. Það eru í rauninni góðar fréttir því þá er auðveldara að breyta þessu.“
Þórdís Lóa hefur áhyggjur af því hvernig útvarpssvið 365 kom út í mælingum Creditinfo. „En ég greindi vilja til verka þar. Fólk hefur áhuga á að breyta þessu en svona gerist ekki á einni nóttu. Það er greinilegt að 365 eru búnir að gera góða hluti en útvarpið hefur ekki fylgt með. Það er kúltúr sem þarf að skoða,“ segir hún.
Frétt mbl.is: Konur mæta ekki vegna barna
Þórdís Lóa kveðst vera ánægð með að bæði 365 og Rúv skuli taka þessi mál föstum tökum. „Það sem skiptir máli er að tjalda ekki til einnar nætur. Við viljum að þetta breytist hægt og rólega og verði eðlilegt hlutfall af þjóðfélaginu.“
Frétt mbl.is: Eigum enn óralangt í land