Allt tiltækt lið slökkviliðsins í Borgarfirði, Snæfellsnesi og Akranesi var kallað út um fimmleytið vegna eldsvoða í hausaþurrkun á bænum Miðhrauni í Eyja- og Miklaholtshreppi á sunnanverðu Snæfellsnesi.
Bjarni Þorsteinsson, slökkviliðsstjóri í Borgarnesi, segir ljóst að baráttan við eldinn eigi eftir að vera erfið og taka langan tíma. Slökkviliðsmenn úr öllum bæjum á Snæfellsnesi og Borgarnesi eru komnir á staðinn og eins eru slökkviliðsmenn á leið frá Akranesi á staðinn. Brunavarnir Suðurnesja senda síðan búnað á staðinn.
Að sögn Bjarna er mikill eldur í fiskþurrkuninni og aðstæður mjög erfiðar. „Þetta er barátta sem á eftir að standa eitthvað,“ segir Bjarni í samtali við mbl.is.
Um er að ræða gríðarlega stór hús og mikinn eldsmat, að sögn Bjarna.
Uppfært klukkan 7.43
Bjarni segir að tekist hafi að verja nýtt hús á jörðinni en þar er einnig hausaþurrkun. Slökkviliðið er enn að störfum en enginn búskapur er á jörðinni.