Þingfesting í máli ákæruvaldsins gegn Thomas Møller Olsen, sem grunaður er um að hafa banað Birnu Brjánsdóttur, fer fram í Héraðsdómi Reykjaness á mánudaginn kl. 13. Ákæra í málinu var gefin út fyrir viku en héraðsdómur fékk málið til sín sama dag.
Olsen var úrskurðaður í 14 vikna gæsluvarðhald í kjölfar útgáfu ákærunnar.
Birna Brjánsdóttir hvarf 14. janúar sl. Hún sást síðast á eftirlitsmyndavélum í miðborg Reyjavíkur. Rannsókn lögreglu beindist fljótlega að skipverjum á grænlenska togaranum Polar Nanoq og voru tveir þeirra handteknir um borð 17. janúar.
Birna fannst látin 21. janúar. Hún var tvítug.