Annie Mist Þórisdóttir, sem náði þriðja sæti á heimsleikunum í Crossfit sem fram fóru um helgina, fær í sinn hlut rúmlega átta milljónir króna. Fær hún sjötíu þúsund bandaríkjadali fyrir þriðja sætið auk sjö þúsund dala fyrir árangur sinn í einstaka greinum.
Ragnheiður Sara Sigmundsdóttir, sem sigraði í síðustu greininni og náði því fjórða sætinu, fær þá 45 þúsund bandaríkjadali eða sem nemur rúmlega 4,7 milljónum króna. Til viðbótar því fær hún fimm þúsund dali fyrir árangur í einstaka greinum.
Katrín Tanja Davíðsdóttir, sem hefur staðið uppi sem sigurvegari keppninnar síðustu tvö ár, lauk keppni að þessu sinni í fimmta sæti. Fær hún því rúmlega þrjár milljónir í sinn hlut, eða þrjátíu þúsund bandaríkjadali, auk sjö þúsund bandaríkjadala fyrir árangur í einstaka greinum. Á síðasta ári hlaut hún rúmar 35 milljónir króna fyrir sigurinn.
Björgvin Karl Guðmundsson endaði að lokum í sjötta sæti á heimsleikunum og fær hann tæpar þrjár milljónir króna fyrir, eða 26 þúsund bandaríkjadali.
Þuríður Erla Helgadóttir fær þá sjö þúsund dali, eða rúmlega 700 þúsund krónur, fyrir 18. sætið.
Samtals fá keppendurnir fimm því tæpa 21 milljón króna fyrir þátttöku sína í leikunum, samkvæmt reglum um verðlaunafé.
Verðlaunaféð er þá skattskylt, en greiða þarf skattinn hér á landi samkvæmt tvísköttunarsamningi sem í gildi er á milli Íslands og Bandaríkjanna, eða í því landi þar sem viðkomandi hefur búsetu.