Tafir urðu á afhendingu níu rafmagnsstrætisvagna sem áætlað var að kæmu í umferð nú í haust vegna veikleika í yfirbyggingu vagnanna. Þeir eru framleiddir af kínverska fyrirtækinu Yutong.
Nú hefur verið leyst úr vandanum og áætlað er að fyrstu vagnarnir komi til landsins í byrjun næsta árs.
„Yfirbyggingin á vögnunum var úr áli en í prófunum kom í ljós ákveðinn veikleiki í álinu þannig að þeir skiptu því út fyrir stál,“ segir Jóhannes Svavar Rúnarsson, framkvæmdastjóri Strætó, í umfjöllun um fyrirhugaða rafstrætisvagna í Morgunblaðinu í dag.