Ingvi Hrafn Jónsson, sjónvarpsmaður og stjórnandi þáttarins Hrafnaþing á ÍNN, greinir frá því á Facebook-síðu sinni að hópur velunnara ÍNN eigi í viðræðum við skiptastjóra um kaup á félaginu. Fyrr í dag var greint frá því að stjórnendur sjónvarpsstöðvarinnar hefðu ákveðið að leggja stöðina niður og að útsendingum yrði hætt í kvöld.
Í tilkynningu sem birt var á Facebook-síðu sjónvarpsstöðvarinnar í dag kom fram að ÍNN hefði glímt við mikinn skuldavanda um árabil. Tækjabúnaður stöðvarinnar þarfnaðaist endurnýjunar og ljóst væri að stöðin yrði ekki rekin áfram nema nýtt fjármagn kæmi til.
Miðað við færsluna sem Ingvi Hrafn birtir á Facebook, þá er hann bjartsýnn á að kaup á félaginu takist. „Hrafnaþing verður sennilega á sínum stað á morgun,“ skrifar hann.