Laxeldismál verða til umræðu í þjóðmálaþættinum Þingvöllum á útvarpsstöðinni K100 í dag, en þátturinn hefst kl. 10. Gestir þáttarins verða þau Jón Þór Ólason, formaður Stangveiðifélags Reykjavíkur og Sif Konráðsdóttir lögfræðingur, sem starfaði sem aðstoðarmaður Guðmundar Inga Guðbrandssonar umhverfisráðherra þar til í maí síðastliðnum.
Þau munu fara yfir laxeldismálin með þáttastjórnanda Þingvalla, Björtu Ólafsdóttur.
Málefni laxeldisfyrirtækja á Vestfjörðum hafa verið til mikillar umfjöllunar síðustu tíu daga, eða allt frá því að úrskurðarnefnd umhverfis- og auðlindamála felldi úr gildi ákvarðanir Umhverfisstofnunar um útgáfu starfsleyfa fyrir rekstraraðilana Arctic Sea Farm hf. og Fjarðalax hf. í Patreks- og Tálknafirði.
Sú ákvörðun var umdeild og skapaði mikla óvissu fyrir atvinnulífið á sunnanverðum Vestfjörðum. Ríkisstjórnin brást hratt við þeirri stöðu sem upp kom með lagasetningu um að ráðherra geti gefið út bráðabirgðastarfsleyfi, sem hefur einnig reynst umdeild.
Björt og gestir hennar munu ræða þessi mál í þættinum, sem hefst sem áður segir kl. 10.