Innlent | mbl | 4.11.2023 | 20:10

Banamanninum gert að greiða tæpar 30 milljónir

Banamaður í morði sem framið var á bílastæði við verslunarhúsnæði í Hafnarfirði í apríl, sem dæmt var í í gær, er gert að greiða tæpar 30 milljónir króna. mbl.is/Hákon

Karlmanninum, sem sakfelldur var fyrir manndráp á bílastæði við verslunarhúsnæði í Hafnarfirði í apríl, hefur verið gert að greiða tæpar 30 milljónir króna í málskostnað, miskabætur og sakarkostnað. Dómurinn féll í gær og hlaut hann 10 ára fangelsisdóm.

Frétt af mbl.is

Tíu ára dómur fyrir manndráp í Hafnarfirði

Er banamanninum gert að greiða 3.978.868 krónur í málskostnað sem rennur í ríkissjóð, 11.651.699 krónur í sakarkostnað, 3.000.000 í miskabætur með vöxtum til barnsmóður hans fórnarlambsins fyrir hönd ólögráða dóttur fórnarlambsins, 8.129.657 króna bætur vegna missis framfæranda með 4,5 % vöxtum og svo loks 2.394.837 krónur með vöxtum til móður hins látna.

Tveir aðrir ungir menn hlutu tveggja ára dóm fyrir sinn þátt í árásinni, en brot þeirra flokkaðist undir vísvitandi líkamsárás. Annar þeirra greiðir 10.385.974 í sakarkostnað og hinn greiðir 10.454.684 krónur í sakarkostnað.

Frétt af mbl.is

Stundarbrjálæði vegna 5.000 kr. kostaði annan mann lífið

17 ára gömul stúlka sakfelld

Sautján ára gömul stúlka hlaut tólf mánaða skilorðsbundinn dóm til fimm ára fyrir brot á hjálparskyldu, en hún tók árásina upp. Hún greiðir 5.088.953 krónur í sakarkostnað.

Annan sakarkostnað upp á 2.816.625 krónur greiða árásarmennirnir þrír óskipt.

Eins og mbl.is greindi frá í gær þá náðist atburðarásin að miklu leyti á upptöku í nokkrum mismunandi myndskeiðum. Virðast þau sýna það að upptök árásarinnar hafi verið vegna meintrar 5.000 króna fíkniefnaskuldar.

Fórnarlambið var stungið sex sinnum og lést af stungusári beint í hjartað. Alls liðu 8-9 mínútur frá upphafi árásar og þar til fórnarlambið lá í valnum.