Dómsmálaráðherra virðist hafa blokkað aðganga á Instagram sem hafa merkt hann í færslur vegna málefna Palestínumanna.
Haukur Bragason staðfestir í samtali við mbl.is að Guðrún Hafsteinsdóttir dómsmálaráðherra hafi blokkað hann eftir að hann merkti opinberan aðgang Guðrúnar í færslu, ásamt öðrum ráðherrum ríkisstjórnarinnar. Fjallaði færslan um kröfur félagsins Íslands-Palestínu.
Gerir þetta að verkum að félagið og Haukur geta ekki lengur merkt ráðherrann í færslur, sent honum skilaboð né skoðað prófílinn hans á Instagram.
Ekki virðist mikið hafa þurft til í tilviki Hauks þar sem hann kveðst engin samskipti hafa átt við ráðherrann utan einnar merkingar á Instagram.
„Ég hef ekkert haft samskipti við dómsmálaráðherra út af einu né neinu fyrir utan þetta eina tagg,“ segir Haukur, sem vakti athygli á hegðun ráðherrans á X.
Hann segist vita að aðrir hafi lent í því sama, þar á meðal félagið Ísland-Palestína, sem styður baráttu Palestínumanna gegn hernámi og rétt flóttafólks til að snúa til síns heima.
Félagið krefst þess að fá fund með ráðherrum ríkisstjórnarinnar, fjölskyldur þeirra verði sameinaðar á ný og að brottvísanir palestínsks flóttafólks verði stöðvuð og vernd verði veitt.