Innlent | mbl | 5.3.2024 | 19:15

Stigmögnun í mótmælum og ráðamönnum hótað

Samsett mynd

Ákveðin stigmögnum hefur sést í mótmælum að undanförnu og eru dæmi um það að ráðamönnum hafi verið hótað.

Þetta segir Guðrún Hafsteinsdóttir dómsmálaráðherra í samtali við mbl.is að loknum ríkisstjórnarfundi í morgun.

Í gær var uppþot í þinginu þar sem karlmaður hékk utan á handriði þingpallanna á Alþingi í gær og virtist hóta því að hoppa niður. Gerði hann þetta á sama tíma og Guðrún var að mæla fyrir nýju útlendingafrumvarpi.

Frétt af mbl.is

Myndskeið: Uppnám á Alþingi

Vonar að þetta sé ekki til framtíðar komið

Er þetta til marks um nýjan veruleika á Íslandi?

„Ég veit það ekki. En það eru auðvitað búin að vera mótmæli við Alþingishúsið og ráðherrabústaðinn í nokkra mánuði. Maður hefur séð ákveðna stigmögnun þessara mótmæla og þetta var kannski birtingarmynd þess í gær. Auðvitað vonast maður til þess að þetta sé nú ekki eitthvað til framtíðar komið,“ segir Guðrún.

Bjarni Benediktsson utanríkisráðherra varð fyrir aðsúgi mótmælenda í desember og glimmeri kastað yfir hann. Í febrúar var svo ráðist að Diljá Mist Einarsdóttur, þingmanni Sjálfstæðisflokksins, er hún var að koma úr þinginu. Klakastykki var kastað í bíl hennar og var hreytt í hana fúkyrðum þar til lögreglumaður skarst í leikinn.

Frétt af mbl.is

Mótmælandi réðst að Diljá Mist

Frétt af mbl.is

„Alvarleg þróun“ ef óttast þarf öryggi stjórnmálamanna

Ráðamenn fengið hótanir

mbl.is greindi frá því í febrúar að lögreglan tekið ákvörðun um að verja þingflokk Sjálfstæðisflokksins í hringferð flokksins um landið. Voru lögreglumenn sjáanlegir á fundum flokksins víðs vegar en Hildur Sverrisdóttir þingflokksformaður tók fram að lögregluverndin væri ekki að beiðni flokksins, heldur veitt af lögreglunni vegna áhættumats.