Lögregla stöðvaði atlögu að Bjarna

Mótmælendur reyndu að veitast að Bjarna Benediktssyni utanríkisráðherra eftir ávarp hans á viðburði í Veröld – húsi Vigdísar á vegum Háskóla Íslands rétt fyrir hádegi í dag. Rúv greindi fyrst frá.

Þrjár konur hlupu með fána Palestínu í átt að Bjarna en lögregla afstýrði því að meira yrði úr málinu, að því er Hersir Aron Ólafsson, aðstoðarmaður hans, staðfestir við mbl.is.

Frétt af mbl.is

„Alvarleg þróun“ ef óttast þarf öryggi stjórnmálamanna

Lögregla eigi hrós skilið

„Það má hrósa lögreglu fyrir fumlaus viðbrögð, sem afstýrðu því að meira yrði úr málinu,“ segir Hersir.

Konurnar voru ekki handteknar í kjölfar atviksins en málið er í skoðun, að sögn Helenu Rósar Sturludóttur, samskiptastjóra Ríkislögreglustjóra.

Utanríkisráðherra hefur notið öryggisgæslu ríkislögreglustjóra síðan kastað var glimmeri yfir hann í sama húsnæði háskólans í desember síðastliðnum.

Atvikið varð á málþingi Alþjóðamálastofnunar Háskóla Íslands  og sendiráðs Litháens, þar sem lýðræðisbarátta í Austur-Evrópu var til umræðu.

Frétt af mbl.is

Stigmögnun í mótmælum og ráðamönnum hótað

Uppfært klukkan 16.48: Fréttin hefur verið uppfærð með ummælum Helenu Rósar Sturludóttur, samskiptastjóra Ríkislögreglustjóra.

• 2 blogg um fréttina

Bloggað um fréttina

• Örn Gunnlaugsson: Hvenær er mælirinn fullur ?
• Óðinn Þórisson: Vanþakklæti og yfirgangur Palestínu - Araba og þeirra fylgismanna