„Átta ára þrautagöngu hennar [Þórkötlu Ragnarsdóttur] í þessu dómskerfi er lokið og hún er glöð og ánægð yfir því að þessi dómur skyldi hafa gengið eins og hann fór - að hún geti loksins um frjálst höfuð strokið,“ segir Ingólfur Vignir Guðmundsson, lögmaður Þórkötlu, í samtali við mbl.is.
Landsréttur hefur sýknað Þórkötlu af öllum sakargiftum sem henni var gefið að sök en héraðsdómur hafði áður dæmt hana í 15 mánaða skilorðsbundið fangelsi og gert henni að greiða 64 milljónir krónur í sekt til ríkissjóðs.
Var hún ein af af fimm aðilum sem sakfelldir voru í héraði á síðasta ári fyrir stórfelld skattalagabrot og brot á bókhaldslögum. Voru þetta framkvæmdastjórar og stjórnarmenn hjá fyrirtækjunum Brotafl, Kraftbindingum og Starfsmenn ehf.
Þórkatla og Sigurjón G. Halldórsson, einn stjórnenda Brotafls sem var sakfelldur í héraði, áfrýjuðu dómi hérðasdóms til Landsréttar.
Landsréttur staðfesti fyrr í dag dóm héraðsdóms yfir Sigurjóni G. Halldórssyni og hlýtur hann 15 mánaða skilorðsbundinn dóm og er gert að greiða í sekt 64 milljónir króna.