Umboðsmaður barna óskar svara vegna Stuðla

Umboðsmaður barna hefur sent bréf til mennta- og barnamálaráðuneytisins vegna fyrirhugaðrar lokunar meðferðardeild Stuðla í sumar. Umboðsmaður óskar eftir því að fá upplýsingar á því hvernig ákvörðun um lokun stuðli að hagsmunum barna.

Nýlega greindi mbl.is frá því að meðferðardeild Stuðla muni, að öllu óbreyttu, standa lokuð í fjórar vikur í sumar, eða frá 12. júlí til 8. ágúst.

Ástæða fyrirhugaðrar lokunar er sögð bæði vegna fjárhagsskorts og að skortur sé á fagfólki til að sinna meðferðinni á meðan sumarleyfi standa yfir.

Frétt af mbl.is

Meðferðardeild Stuðla lokað tímabundið í sumar

Vandi barnsins verði umfangsmeiri

„Það gefur auga leið að bið barns eftir nauðsynlegri þjónustu líkt og þessari er til þess fallin að vandi barnsins verði umfangsmeiri,“ segir í bréfi umboðsmanns barna.

Umboðsmaður beinir athygli sinni að ákvæðum Barnasáttmálans. Þar er kveðið á um að öll börn eigi rétt á fullkomnustu heilbrigðisþjónustu sem völ er á, auk þess sem stjórnvöld séu skyldug til að tryggja öllum börnum réttindi sín án mismununar.

• Blogga um frétt