Innlent | Kosningar | mbl | 4.3.2009 | 18:00 | Uppfært 5.3.2009 11:18

Margt líkt með Íslandi og fyrrum Afríkunýlendum

Þór Saari, hagfræðingur og sérfræðingur í skuldastýringu Afríkuríkja, segir margt líkt með Íslandi og mörgum skuldugum fyrrum nýlendum í Afríku. Þar hafi þróunin verið svipuð og á Íslandi síðustu 20 árin.

Þór segir, að hér á landi hafi verið við völd spilltur stjórnmálaflokkur með nánast alræðisvald sem hafi rústað stjórnsýslunni. Þegar samfélög séu komin á þessa braut nái þau ekki að snúa við og endi í örbirgð. Fyrsta skrefið sé skuldasöfnun og síðan verði ekki til peningar til að greiða skuldirnar og innra stoðkerfið fari að hrynja.

Þór er einn frambjóðenda Borgarahreyfingarinnar sem kynnti stefnumál sín í Iðnó í dag.

Hann segir að stefna fyrri og núverandi ríkisstjórnar sé að takast á hendur skuldbindingar fjárglæframanna erlendis og leyfa Alþjóða gjaldeyrissjóðnum að stýra afkomu ríkisins. Það leiði bara til einnar niðurstöðu, sem sé félagsleg örbirgð. Því hafni Borgarahreyfingin algerlega.