Í gærkvöldi hélt ný hreppsnefnd Árneshrepps, sem kjörin var í sveitarstjórnarkosningunum þann 31. maí, sinn fyrsta fund. Aðalmál nýrrar hreppsnefndar var kosning nýs oddvita og vara oddvita. Eva Sigurbjörnsdóttir hótelstýra á Hótel Djúpavík var kjörin sem nýr oddviti hreppsins og Ingólfur Benediktsson Árnesi 2 sem vara oddviti.
Aðrir í hreppsnefnd eru Guðlaugur Agnar Ágústsson bóndi á Steinstúni,Hrefna Þorvaldsdóttir húsmóðir og matráður Árnesi 2 og Elísa Ösp Valgeirsdóttir skólastjóri Árnesi 2. Þess má geta að Hrefna og Elísa eru mæðgur. Þrjár konur skipa nú hreppsnefnd Árneshrepps og eru því í meirihluta.
Varamenn í hreppsnefnd Árneshrepps sem voru kosnir þann 31. maí voru þessir: Gunnar Dalkvist bóndi Bæ, Sveindís Guðfinnsdóttir bóndi og flugvallarvörður Kjörvogi, Bjarnheiður Júlía Fossdal húsmóðir og bóndi Melum 1, Ingvar Bjarnason bóndi og smiður Árnesi 2 og Pálína Hjaltadóttir húsmóðir og bóndi Bæ.