Magnús Þór Hafsteinsson ritstjóri, rithöfundur og fyrrverandi þingmaður Frjálslynda flokksins, mun skipa oddvitasæti Flokks fólksins í Reykjavíkurkjördæmi norður í komandi Alþingiskosningum.
„Flokkur fólksins berst fyrir göfugum málstað sem er að rétta hlut þeirra verst settu í samfélaginu,“ er haft eftir Magnúsi Þór í fréttatilkynningu. „Ég hef hrifist af einurð og festu Ingu Sælands formanns Flokks fólksins. Hún er sú rödd sem alþýða þessa lands hefur beðið eftir að heyra frá hruni.”
Magnús Þór sat á Alþingi fyrir Frjálslynda flokkinn kjörtímabilið 2003-2007. Undanfarin ár hefur hann sinnt bókaskrifum, hvalveiðum, blaðamennsku og ritstjórn.