Tækni & vísindi | mbl | 3.3.2007 | 11:29

Fundu vísbendingar um stórt haf undir Austur-Asíu

Bandarískir jarðskjálftafræðingar hafa fundið vísbendingar um stórt haf undir Austur-Asíu, og telja þeir það vera að minnsta kosti jafn stórt og Norðuríshafið. Þetta er í fyrsta sinn sem vísbendingar finnast um svo stórt vatn undir jarðskorpunni, að því er vefurinn LiveScience greinir frá.

Það voru skjálftafræðingar við Washington State-háskóla og Háskólann í Kaliforníu sem gerðu þessa uppgötvun, en frá henni verður greint nánar í væntanlegu sérriti frá Bandaríska jarðeðlisfræðisambandinu.

Skjálftafræðingarnir rannsökuðu rúmlega 600.000 skjálftarit hvaðanæva úr heiminum og tóku eftir því að undir tilteknu svæði í Asíu virtust skjálftabylgjur dofna og hægja lítillega á sér.

Hvort tveggja samræmist því að vatn sé þarna að finna, sagði annar skjálftafræðingurinn, Michael Wysession. Hann hefur kallað þetta fyrirbæri „Pekingfrávikið“, því að bylgjurnar virtust dofna mest undir Pekingborg.