Hinn 36 ára gamli Andemariam Teklesenbet Beyene er fyrsti maðurinn sem fær ígræddan barka úr gerviefni og stofnfrumum. Beyene er meistaranemi í jarðeðlisfræði við Háskóla Íslands.
Aðgerðin var framkvæmd þann 9. júní á Karólínska sjúkrahúsinu í Stokkhólmi. Beyene var með krabbamein í barka og aðgerðin markar tímamót, en barkinn er búinn til úr gerviefni og stofnfrumum mannsins og því þarf ekki að bíða líffæragjafar við slíkar aðstæður.
Hætta var á því að æxli í hálsi Beyene teppti öndunarveg hans, en enginn hentugur líffæragjafi hafði fundist, þrátt fyrir langa bið.
Þessi aðferð er talin henta börnum sérlega vel, þar sem afar fáir líffæragjafar eru á barnsaldri.
Um samstarfsverkefni var að ræða á milli lækna Karólínska sjúkrahússins, University College í London og Harvard háskóla.
Vegna þess að stofnfrumur mannsins voru í barkanum, þá var engin hætta á að hann hafnaði honum og búist er við að hann verði útskrifaður af sjúkrahúsinu á morgun.