13. september 2008 | Innlendar fréttir | 722 orð | 1 mynd

Skilja ekkert í framgöngu lögreglunnar

Hælisleitendur óttast stimplun samfélagsins eftir víðtæka húsleit á fimmtudag og efndu til mótmæla við lögreglustöð

Mótmæla Hælisleitendurnir og stuðningsmenn þeirra voru með gjallarhorn við lögreglustöðina.
Mótmæla Hælisleitendurnir og stuðningsmenn þeirra voru með gjallarhorn við lögreglustöðina. — Morgunblðið/Hilmar Bragi
Eftir Örlyg Stein Sigurjónsson orsi@mbl.is AÐGERÐIR lögreglunnar hjá hælisleitendum á Reykjanesi á fimmtudag hafa vakið hörð viðbrögð hælisleitenda og mótmæltu þeir aðgerðunum fyrir framan lögreglustöðina í Keflavík í gær. Mótmælin fóru friðsamlega...
Eftir Örlyg Stein Sigurjónsson

orsi@mbl.is

AÐGERÐIR lögreglunnar hjá hælisleitendum á Reykjanesi á fimmtudag hafa vakið hörð viðbrögð hælisleitenda og mótmæltu þeir aðgerðunum fyrir framan lögreglustöðina í Keflavík í gær. Mótmælin fóru friðsamlega fram.

Meðal mótmælenda er Farzad Rahmanian, hælisleitandi frá Íran sem dvalið hefur hérlendis í tæp þrjú ár. Segir hann þær til þess fallnar að gera hælisleitendur tortryggilega í augum almennings. Auk þess telur hann gjörsamlega óskiljanlegt hvers vegna lögreglan tók peninga af fólki í húsleitinni.

„Ég lenti í húsleit árið 2006 en þá voru ekki neinir peningar teknir af fólki,“ segir hann „Við gerðum engar athugasemdir við húsleitina þá, en hvers vegna var tekið upp á að hirða peningana af okkur að þessu sinni? Og til hvers voru þeir með fíkniefnahund hér í leit að efnum? Ég veit ekki hvað lögreglan var að hugsa. Erum við óvinir í þeirra augum eða hryðjuverkamenn? Þeir komu hingað með valdi og virðingarleysi og settu síðan allt í fjölmiðla og brugðu þannig upp mynd af okkur sem óvinum eða hryðjuverkamönnum. Ef einhvern okkar langar nú í göngutúr í Keflavík, þá verða borin kennsl á okkur og bent á okkur. Það er af þessum ástæðum sem við mótmælum aðgerðunum á fimmtudaginn. Ég bendi líka á að það er rangt hjá lögreglunni að hún hafi tekið 1,6 milljónir króna í húsleitinni því hún tók 480 þúsund krónur.“

Rahmanian segir ennfremur að enginn hælisleitandi hafi fengið að sjá húsleitarheimildir lögreglunnar.

Margra daga undirbúningur

Jóhann R. Benediktsson lögreglustjóri á Suðurnesjum bendir á að aðgerðirnar hafi farið fram í einu og öllu samkvæmt lögum og margra daga vinna hafi farið í að undirbúa aðgerðina með tilliti til réttinda hælisleitenda. Bæði lögmaður fyrir hælisleitendurna og túlkur hafi verið á staðnum. Þá sé það misskilningur að aðeins hafi verið teknar 480 þúsund krónur í aðgerðinni. Í húsleitarheimild hafi verið heimild til að leita að peningum, fíkniefnum og gögnum. Um fíkniefnaþáttinn segir hann að uppi hafi verið grunur um að fíkniefni kynnu að vera í fórum einhverra, því áður hafi fíkniefni fundist í svona aðgerð. Ekkert fannst þó að þessu sinni.

Jóhann segir að eftir aðgerðirnar hafi einn hælisleitandi óskað eftir að fá að fara strax úr landi. Slíkt sé varla hægt að túlka öðruvísi en svo að viðkomandi hafi verið hér á fölskum forsendum.

„Menn verða að gera sér grein fyrir því að það er ákveðið mynstur í þessari flóru, hérlendis sem annars staðar,“ segir hann. „Því miður er það þannig að sumir í hópi hælisleitanda á hverjum tíma eru hér á fölskum forsendum. En það er fjarri lagi að slíkt gildi um alla.“

Haukur Guðmundsson forstjóri Útlendingastofnunar segir að í aðgerðunum hafi safnast gögn sem muni varpa ljósi á aðstæður rúmlega 10 hælisleitenda. Hann býst við að ýmsum haldlögðum munum, þar á meðal peningum, verði skilað aftur til hælisleitenda. Útlendingastofnun mun hins vegar taka fyrir mál þeirra hælisleitenda sem fúlgur fjár fundust hjá, og tjá þeim að frá og með 12. september sé Útlendingastofnun hætt að greiða fyrir þá uppihald. Þeir geti gert það sjálfir. Kostnaður verði dreginn af hinum haldlögðu peningum. „Þegar um er að ræða verulegar fjárhæðir hjá fólki kviknar auðvitað grunur um að það séu í gangi skrítnir hlutir sem þarf að rannsaka. Í þessum haldlagningum felst ekki að það sé verið að svipta fólk sínu fé. Lagt er hald á peninga meðan verið er að rannsaka málið.

Með mikið reiðufé á sér

Það er sérkennilegt að hér hafa verið einstaklingar í hælismeðferð sem hafa fengið húsnæði og fæði greitt af Útlendingastofnun svo nemur hundruðum þúsunda króna – en svo kemur í ljós að þeir eru með dvalarleyfi í Evrópusambandslandi og með hundruð þúsunda króna á sér í reiðufé,“ segir Haukur Guðmundsson forstjóri Útlendingastofnunar.

Í útlendingalögum segir að heimilt sé að veita hælisleitanda bráðabirgðadvalarleyfi þar til ákvörðun hefur verið tekin um hælisumsóknina. Einnig er heimilt, að beiðni útlendings sem hefur fengið endanlega hælissynjun eða dvalarleyfi sem kemur ekki til framkvæmda að svo stöddu, að veita honum bráðabirgðadvalarleyfi þar til synjunin kemur til framkvæmda.

Í hnotskurn
» Útlendingamál þetta er fyrsta málið sem kemst í hámæli eftir að hið umdeilda mál Pauls Ramsesar var til umfjöllunar í fjölmiðlum og varð tilefni mótmæla við dómsmálaráðuneytið í júlí.
» Mál útlendinganna að þessu sinni verða rannsökuð og ekki ósennilegt að hlutum og peningum verði skilað til eigenda sinna. Þeir sem voru með fúlgur geta þó ekki vænst þess að fullu.

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.