23. nóvember 2000 | Aðsent efni | 458 orð | 1 mynd

Sjúkdómar

Vöðvaslensfár - Myasthenia gravis

Ólöf  Eysteinsdóttir
Ólöf Eysteinsdóttir
MG er sjálfnæmissjúkdómur, segir Ólöf S. Eysteinsdóttir, þar sem taugaboðin ná ekki að virkja vöðvana.
PISTILL vikunnar á NetDoktor.is fjallar um vöðvaslensfár. Pistil þennan skrifar Sigurður Thorlacius, sérfræðingur í taugalækningum og tryggingayfirlæknir.

MG-félag Íslands fagnar þessum tímamótum. MG-félagið er félag sjúklinga með sjúkdóminn Myasthenia Gravis (vöðvaslensfár), aðstandenda þeirra og annarra sem áhuga hafa á málefninu.

MG er sjaldgæfur sjúkdómur sem finnst hjá fólki á öllum aldri en kemur oftast fram seint á gelgjuskeiði eða á fullorðinsaldri.

MG er sjálfnæmissjúkdómur þar sem taugaboðin ná ekki að virkja vöðvana. Hömlunin leynir sér og einkennin eru breytileg frá einum degi til annars og einni klukkustund til annarrar. Eftir stutta hvíld endurnýjast kraftarnir og þess vegna er áríðandi fyrir sjúklinga með MG að hvílast vel og ofreyna sig ekki.

Hjá mörgum eru fyrstu einkennin þau, að augnlokin verða þung svo erfitt verður að halda þeim uppi. Margir sjá tvöfalt og eiga erfitt með að tala, tyggja eða kyngja. Sjúklingurinn verður nefmæltur og röddin drafandi, sérstaklega í löngum samtölum. Aðrir verða þannig varir við sjúkdóminn að þeir hrasa oft og missa hluti út úr höndunum. Þeir eiga erfitt með að rísa úr sæti og ganga stiga. Það getur verið erfitt að halda höfði af því hnakkavöðvarnir verða kraftlitlir. Þungt verður að lyfta handleggjum og fótum. Einkenni koma fram í andlitsvöðvum þannig að eðlilegt látbragð hverfur. Andlitið fær á sig þreytublæ og fólk getur hvorki hlegið né brosað. Því er það að MG-sjúklingar líta oft út fyrir að vera leiðir eða gramir þó þeir séu glaðir.

Oft hefur viljað brenna við að sjúkdómsgreining sjúklinga með MG hafi ekki reynst rétt í upphafi. Hefur fólkið jafnvel verið talið taugaveiklað, duglaust, latt eða bara ímyndunarveikt og fengið róandi lyf eða svefnlyf. Þessi lyf hafa auðvitað mjög alvarlegar afleiðingar fyrir sjúklingana þar sem vöðvar þeirra slappast enn meira en ella.

Markmið MG-félagsins er að kynna sjúkdóminn og styðja við bakið á sjúklingunum og fjölskyldum þeirra. Nauðsynlegt er að ná til sjúklinganna og rjúfa einangrun þeirra.

Félagið hefur haldið fundi þar sem fyrirlesarar, bæði innlendir og erlendir, hafa komið fram með ýmsan fróðleik, tekið þátt í sýningum og norrænu samstarfi. Félagið lét gera texta við mynd um einkenni MG-sjúkdómsins. Félagið hefur gefið út bækling sem skýrir sjúkdóminn Myasthenia gravis. Finna má fróðleik um félagið og sjúkdóminn á heimasíðu ÖBÍ WWW.obi.is.

Félagið gefur út lyfjakort fyrir sjúklinga með Myasthenia gravis (vöðvaslensfár) sjúkdóminn. Á kortinu er skrá yfir nokkur lyf sem MG-sjúkir eiga að forðast.

Það er mikið öryggi fyrir sjúklingana að geta borið á sér kort sem bæði lýsir sjúkdómnum og varar við lyfjum sem MG-sjúkir eiga að forðast.

Það þarf að minna heilbrigðisstarfsfólk á að líta þarf á heildarlíðan MG-sjúkra og taka mark á sjúklingunum. MG-sjúkum hættir til að dofna fyrir einkennum sjúkdómsins og segja síðan, að þeim sé batnað, eða þá að þeir nota svo krafta sína þegar þeir fá þá að þeir ofgera sér.

Höfundur er formaður MG-félags Íslands.

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.