Uppþvottavélin þrifin - aðferð

Það er nauðsynlegt að þrífa sjálfa uppþvottavélina reglulega til að hún geti skilað góðu verki. Hægt er að kaupa sérstakt efni í vélina til þess en það má einnig gera það með ókemískum efnum sem leynast í flestum eldhússkápum. Auk þess er gott að láta vélina ganga af og til án leirtaus til að skola sig.

Þú þarft:
Uppþvottalög
Hvítt edik
Matarsóda
Tannbursta
Uppþvottabursta

Svona lítur sían í flestum uppþvottavélum út.

1. Byrjið á að fjarlægja síuna úr vélinni en þar safnast gjarnan fitan og matarafgangar. Sían er staðsett í botni vélarinnar en hana þarf að þrífa reglulega. Látið síuna liggja í heitu sápuvatni í um 15 mínútur. Ef enn eru föst óhreinindi í síunni skaltu skrúbba hana varlega með tannbursta en sían er ekki mjög harðgerð svo farðu varlega.
   
   
2. Setjið síugreyið aftur á sinn stað.
   
   
3. Hellið 1 bolla af ediki í vélina og látið hana ganga á lengsta prógramminu. Sýran í edikinu hreinsar og losar vonda lykt.
   
   
4. Dreifið einum bolla af matarsóda í botn vélarinnar og látið liggja yfir nótt.
   
   
5. Skrúbbið botninn lauslega með uppþvottabursta.
   
   
6. Setjið vélina í gang og látið hana ganga einn hring tóma.
   
   
7. Nú ætti hún að vera skínandi fín og þvo mun betur.

• Blogga um frétt