Matur | mbl | 1.4.2024 | 12:30

Einfaldur ítalskur kjúklingaréttur borinn fram á pönnu

Ómótstæðilega girnilegur kjúklingaréttur sem þið eigið eftir að elska. Einfaldur og allt eldað á einni pönnu, gerist ekki betra. mbl.is/Árni Sæberg

Þessi réttur er alger snilld fyrir huggulega kvöldstund með fjölskyldunni og kemur úr smiðju Margrétar Ríkharðsdóttir matreiðslumeistara og einn eigenda veitingastaðarins Duck & Rose. Hér er á ferðinni einfaldur ítalskur kjúklingaréttur og allt er eldað á einni pönnu.

Margrét Ríkarðsdóttir matreiðslumeistari og einn eigenda veitingastaðarins Duck & Rose á heiðurinn af þessum ómótstæðilega kjúklingarétti. Hún er snillingur að koma bragðlaukunum á flug. mbl.is/Árni Sæberg

„Þessi kjúklingaréttur er alveg það frábær að ég myndi elda hann fyrir matarboð og bjóða upp á gott vín með. Það tekur um 30-40 mínútur að útbúa réttinn og allt gert á einni pönnu sem er mesti kosturinn. Síðan er líka geggjað að eiga smá afgang í hádegismat daginn eftir,“ segir Margrét.

Einfaldur ítalskur kjúklingaréttur – borinn fram á pönnu

Fyrir 4-6

600-800 g úrbeinuð kjúklingalæri
1 krukka sólþurrkaðir tómatar( hægt að kaupa saxaða til þess að spara sér tíma)
4 hvítlauksgeirar eða 1 heill hvítlaukur
1 chili smátt skorið (má sleppa)
2 stk. kjúklingakraftur
2 msk. óreganó
2 msk. timian
1 msk. chili flögur
200 g orzo pasta eða eftir smekk
1 peli rjómi (250 ml)
Vatn 360 ml
Hveiti eftir þörfum
Salt og pipar eftir smekk
50 g parmesan-ostur
Ferskt basilíka eftir smekk

Aðferð:

Byrjið á því að hita ofninn í 200°C hita.
Veltið kjúklingalærunum upp úr hveiti og steikið síðan á háum hita í um það bil 2 mínútur á hvorri hlið eða þar til þau verða gullinbrún.
Kryddið til með salti og pipar.
Merjið hvítlaukinn og skerið chili smátt á meðan.
Setjið kjúklingalærin síðan á disk til hliðar.
Hellið á pönnuna 2 matskeiðar af olíu, ég nota olíuna af sólþurrkuðu tómötunum.
Setjið síðan orzo pastað út á pönnuna ásamt hvítlauk og chili leyfið að krauma á miðlungshita og hellið svo vatninu og rjómanum saman við.
Skerið sólþurrkuðu tómatana í grófa bita.
Setjið næst kjúklingakraftinn saman við vökvann á pönnunni og ásamt kryddunum.
Hrærið aðeins í blöndunni og leyfið suðunni að koma upp og setjið þá kjúklinginn og sólþurrkuðu tómatana á pönnuna.
Látið krauma í 5 mínútur við miðlungshita setjið svo hálfan poka (50 gr) af rifnum parmesan-osti yfir og bakið inn í ofni í 10 mínútur á 200°C hita.
Takið úr ofninum og stráið ferskri basilíku yfir.
Berið fram með klettasalatið og njótið vel.