Jakobína Jónsdóttir er crossfit-þjálfari og mikill heilsudólgur. Hún hefur stundað íþróttir frá því að hún var barn en varð heltekin af crossiti fyrir sjö árum. Síðan þá hefur hún keppt á mörgum Evrópumótum og á þremur heimsleikum í crossfit. Jakó eins og hún er kölluð var í óða önn að pússa steypu þegar Matarvefurinn heyrði í henni. „Á næstu dögum er ég að fara að opna mína eigin stöð, Granda101, sem er staðsett á frábærum stað á Grandanum og hefur upp á að bjóða frábært útisvæði og nóg af bílastæðum,“ segir stálkroppurinn og lét sig ekki muna um að henda í ljúfar helgarpönnukökur fyrir okkur á milli þess sem hún pússaði, lakkaði, græjaði og gerði.