Ristað brauð verður seint flokkað sem sérlega spennandi matur en það hefur heldur betur orðið breyting þar á. Sjálfsagt muna flestir eftir fréttinni okkar um Star Wars-eldhúsgræjurnar en þar var meðal annars að finna brauðrist sem breytti brauðinu í listaverk með mynd af Svarthöfða á. Sjá frétt mbl.is: Blautur draumur Star Wars kokksins.
Nú hefur Toasteroid tekið mun stærra framfaraskref og breytt venjulegri brauðrist í undratæki sem gerir notendum kleift að hanna sínar eigin myndir á brauðsneiðarnar.
Möguleikarnir eru óþrjótandi og getið þið ímyndað ykkur gleðina? Börnin fá sínar myndir, stafi eða hvaðeina það sem þeim dettur í hug. Með einföldu appi er hægt að setja saman einfaldar myndir eða texta sem síðan rata beint á brauðið.
Og síðan má auðvitað bara rista hefðbundna brauðsneið fyrir þá sem nenna ekki að vera í stöðugu flippi.
Brauðristina er hægt að fá í tveimur stærðum og kostar á bilinu sjö til níu þúsund krónur.
Hægt er að panta brauðristina hér.