Við elskum hana Dagnýju Hermannsdóttur grænmetisséní og súrkálsfrömuð. Dagný stendur reglulega fyrir námskeiðum sem eru alltaf troðfull enda er gerjað grænmeti ákaflega vinsælt. Svo ekki sé talað um sniðuga geymsluaðferð á haustuppskerunni. Dagný hefur ekki notað sykur í 17 ár og segir það alls ekki þurfa til gerjunar.
Dagný laumaði að okkur einfaldri uppskrift fyrir þá sem vilja prufa sig áfram í gerjunarbransanum en fyrir áhugasama má sjá upplýsingar um næsta námskeið hennar hér.
Sýrðar gulrætur
500 g gulrætur
5 dl vatn
15 g salt
Krydd eftir smekk svo sem hvítlauksrif, timjan eða dill
Þetta passar í 1 lítra krukku með smelluloki.
Skerið gulræturnar í þykkar sneiðar og setjið í krukkuna, leysið saltið upp í köldu vatni og hellið yfir gulræturnar. Ef vill má krydda eftir smekk, t.d. skera hvítlauksrif í báta og setja á botninn og bæta við kvisti af timian eða dilli. Passið að saltvatnið fljóti yfir gulræturnar. Setjið dálítið saltvatn í frystipoka eða annan sterkan plastpoka og leggið ofan á gulræturnar svo þær haldist undir vatninu. Lokið krukkunni og komið henni fyrir á diski og látið standa við stofuhita í tvær vikur. Það er ráðlegt að opna krukkuna varlega 1-2 sinnum á dag fyrstu vikuna svo kolsýran sem myndast við gerjunina sleppi örugglega út.
Eftir tvær vikur ættu gulræturnar að vera orðnað passlega súrar og saltar. Geymist mánuðum saman í kæli.