Nafnlausi pítsastaðurinn, eins og veitingahúsið á Hverfisgötu 12 er gjarnan kallað, býður upp á ansi óvenjulegan bröns um helgar. „Brönsinum hefur verið tekið mjög vel, en það eru margir sem vita ekki að við erum með góðan bröns, því við erum ekki bara með pizzur, þótt það sé alltaf grunnurinn hjá okkur,“ segir Hinrik Carl Ellertsson, rekstrarstjóri staðarins.
Morgunverðarseðill staðarins er nokkuð frábrugðinn því sem tíðkast en þar er meðal annars að finna morgunverðarpítsu með salthnetum, baunum og skinku sem hentar vel til að deila, mismunandi og nokkuð framandi egg, og skinkuplatta að ógleymdum asískum kjúklingarétti sem nýtur mikilla vinsælda.
Hvernig kom til að þið enduðuð með asískan kjúkling á morgunverðarseðli? „Ég var á matarhátíð í Portland fyrr á árinu og fékk svipaðan rétt á stað þar, fannst hann framúrskarandi og ákvað að gera mína útgáfu af þessum rétti. Hann hefur svo margt, smá sterkur, samt ekki of, mjög saðsamur og er fullkominn í bröns,“ segir Hinrik en kjúklingurinn er borinn fram með steiktu eggi og kimchi og er einn vinsælasti rétturinn i brönsinum ásamt hafragraut með sveppum og grænkáli. „Gaman að bjóða upp á graut sem er frábrugðinn þessum hefðbundna sem Íslendingar þekkja svo vel.“
Spurður um verðlagningu segir Hinrik að flestir réttir séu undir 2.000 kr. „Einnig langar okkur að hvetja fólk til að panta nokkra rétti og deila því það er það sem maður á að gera í bröns. Einnig erum við með frítt fyrir börn.“
Hafragrautur Hverfisgötu 12
200 gr. haframjöl
50 gr. steiktir sveppir
10 gr. grænkál
Salt og pipar
200 ml haframjólk
Aðferð:
Lagaður eins og gamalsdags hafragrautur, haframjöl og haframjólk saman í pott og soðið þar til það er rétt þykkt, þá bætum við sveppum og grænkáli saman út í. Saltað og piprað. Jalapeno-sósa sett yfir
Jalapeno-sósa
magn eftir smekk
Jalapeño
Sojasósa
Limesafi
Olía
Allt sett í blandara og smakkað til.