Í bókinni Máttur matarins eftir Unnur Guðrún Pálsdóttir betur þekkt sem Lukka á Happ og Þórunn Steinsdóttir er að finna eftirfarandi staðreyndir um sykur.
Unnur Guðrún yfirleitt kölluð Lukka á Happ er ötul talskona hollari lífstíls. Matarvefurinn spurði hana út í sykurneyslu og það stóð ekki á svörunum. „Allir vita að það er mikill sykur í gosdrykkjum en hitt er annað að sykur er víða falinn í vörum sem okkur er talin trú um að séu hollar. Sem dæmi má nefna að í 500 g af skyri með ávaxtabragði eru um 8-9 tsk af sykri. Í einni 170 g dós af skyri með ávaxtabragði er því nærri hálfur dagskammtur af hóflegu magni sykurs.“
Hvað er það versta við nútímamataræði?
„Svarið við þessari spurningu er að sjálfsögðu afar flókið og margir eru líklega ósammála um hvert það er. Augljósasta svarið er þó líklega sykraðir drykkir eða sykurneysla almennt. Neysla sykraðra drykkja er gríðarlega mikil á Vesturlöndum, hvort sem um er að ræða gosdrykki, ávaxtasafa, sykraða mjólkur- drykki eða sykraða áfenga drykki, og benda rannsóknir til þess að rekja megi á hverju ári tæplega 200.000 dauðsföll til neyslu sykraðra gosdrykkja. Stærstur hluti dauðsfallanna er vegna sykursýki, síðan hjartasjúkdóma og þar á eftir krabbameins. Rauði þráðurinn er þó yfirleitt offita sem eykur líkurnar á myndun þessara þriggja sjúkdóma til muna. Hér á landi er hlutfall þeirra sem glíma við offitu um 20%, talsvert hærra en á hinum Norðurlöndunum, þar sem hlutfallið er í kringum 12%. Þetta hlýtur að teljast sláandi.“
Sykur, eins og við þekkjum hann, þessi hvíti sem við stráðum yfirleitt yfir pönnukökurnar okkar þegar við vorum yngri (og gerum líklega mörg hver enn) er ein af þeim fæðutegundum sem innihalda nánast ekki neitt sem líkaminn þarfnast til að starfa, nema hitaeiningar, sem við fáum flest of mikið af. Sykur inniheldur ekki prótín, ekki fitusýrur, ekki trefjar, ekki vítamín og engin steinefni. Hann inniheldur sem sagt einungis hitaeiningar en enga næringu. Þarna erum við því komin að rót vandans í nútímasamfélagi, þ.e.a.s. mettun án næringar. “