Matur | mbl | 12.4.2024 | 21:00

Þessi kaka á eftir að fuðra upp af disknum

Syndsamlega góð þessa þristakaka og það verður keppst um síðustu sneiðina. Sjáið þetta krem. Ljósmynd/Andrea Gunnarsdóttir

Hér er á ferðinni þristakaka með saltkaramellu þristakremi sem er svo syndsamlega góð að það er erfitt að stoppa eftir fyrstu sneiðina. Hún er lungamjúk, blaut í sér, með þristabitum og silkimjúku kremi úr þristum og saltkaramellu. Uppskriftin kemur úr smiðju Andreu Gunnars sem heldur úti uppskriftasíðu í sínu nafni. Þessa köku má enginn súkkulaðiunnandi láta fram hjá sér fara, hún er svo unaðslega góð.

Þristakaka

200 g suðusúkkulaði
150 g smjör
175 g púðursykur
4 egg
1 tsk. salt
5 msk. hveiti
1 pk. þristar, skornir í sneiðar

Aðferð:

Hitið ofninn í 180°C hita.
Bræðið suðusúkkulaðið og smjörið saman í potti.
Hrærið saman eggjum og púðursykri í skál með gaffli, ekki þeyta deigið á neinum tímapunkti.
Hrærið súkkulaðiblöndunni saman við eggin og púðursykurinn.
Bætið salti og hveiti saman við og hrærið vel saman.
Bætið þristunum saman við deigið og blandið vel.
Setjið bökunarpappír í botninn á 20 cm móti og smyrjið mótið að innan.
Hellið deiginu í formið og bakið í 45 mínútur.
Látið kökuna kólna alveg áður en kremið er sett á.

Saltkaramelluþristakrem

50 g smjör
50 g smjörlíki
50 g suðusúkkulaði
5 litlir þristar
2 msk. saltkaramella (heimatilbúin eða keypt, ég notaði frá Skúbb)
2 msk. síróp
2 msk. rjómi
2 dl flórsykur

Aðferð:

Þeytið smjör og smjörlíki saman á háum hraða í 7 mínútur.
Bræðið suðusúkkulaði, þrista, síróp og rjóma saman yfir vatnsbaði og látið kólna aðeins.
Setjið 2 matskeiðar af saltkaramellu saman við smjörið og þeytið áfram í nokkrar mínútur.
Bætið þristablöndunni varlega út í og þeytið áfram um dágóða stund.
Bætið að lokum flórsykrinum saman við í smáum skömmtum og þeytið vel á milli.
Þeytið kremið að lokum í 8 mínútur eða þangað til það er orðið alveg slétt og silkimjúkt.
Setjið kremið yfir kökuna og skreytið að vild.