Forsvarsmenn Baggalúts hafa síður en svo setið auðum höndum. Í dag kom út ný plata með gleðigjöfunum. Platan, sem einungis inniheldur sveitasöngva, kallast Pabbi þarf að vinna en á honum flytur Köntrísveit Baggalúts frumsamda sveitasöngvatónlist.
Að því er fram kemur í tilkynningu frá forsvarmönnum Baggalúts er Köntrísveitin Íslendingum að góðu kunn, enda brautryðjandi í flutningi og sköpun sveitasöngvatónlistar hérlendis. Á hljómdiskinum er meðal annars að finna banjótryllinn Settu brennivín í mjólkurglasið vina og hið angurværa lag Pabbi þarf að vinna í nótt, sem notið hafa gífurlegrar hylli unnenda sígildrar sveitasöngvahljómlistar undanfarið.
Að sögn Braga Skúlasonar, stjórnarformanns Baggalúts ehf. og forsvarsmanns sveitarinnar markar útgáfan tímamót í tónlistarsögu Íslands - ef ekki Norðurlanda og jafnvel norðanverðar Evrópu allrar: „Með útgáfu hljómdisksins gefst sönnum aðdáendum sveitasöngvatónlistar í fyrsta skipti færi á að eignast og hlýða á sígilda, ómengaða og alíslenska tónlist af þessum toga. Því ber að fagna - húrra!“, er haft eftir Braga í tilkynningunni.
Það er útgáfufyrirtæki Rúnars Júlíussonar, Geimsteinn, sem gefur hljómdiskinn út.
Vefur Baggalúts er á sömu vefslóð og fyrr, www.baggalutur.is., en hann hefur verið verulega endurbættur eftir langt sumarfrí.